Aberdeen VLV: Van Dankbaarheid tot Skraapkuns – ’n Inspirerende Oggend
Sirkel: Middelland
Tak: Aberdeen
Portefeulje: Openbare Sake
Kuns & Handvlyt
Saamroeper: Annalie Lategan (Openbare Sake)
Carina Esterhuizen (Kuns & Handvlyt)
Beriggewer: Karin Pienaar
Datum: 10 Junie 2026
VLV Aberdeen-tak het op 10 Junie 2026 by Checkmate Coffee Shop in Aberdeen vergader vir ’n oggend gevul met inspirasie, leergeleenthede en kreatiewe uitdrukking.
Voorsitter, Annalie Lategan, het die vergadering geopen met ’n boodskap oor dankbaarheid, gebaseer op 1 Tessalonisense 5:18. Sy het lede herinner dat ware dankbaarheid nie net in tye van voorspoed beoefen word nie, maar veral gedurende moeilike omstandighede wanneer geloof en vertroue in God op die proef gestel word.
Ter viering van Wêreld Oseaandag, wat jaarliks op 8 Junie gevier word, het Annalie Lategan interessante feite oor die wêreld se oseane gedeel. Lede is bewus gemaak van die belangrike rol wat oseane speel in biodiversiteit, klimaatregulering en die ondersteuning van lewe op aarde, asook die uitdagings wat besoedeling, oorbevissing en klimaatsverandering vir mariene ekosisteme inhou.
Die hoogtepunt van die oggend was ’n insiggewende aanbieding deur Mieke van den Bosch van Van den Bosch Makelaars in Graaff-Reinet. Onder die tema “As môre anders lyk, is jou finansies gereed?” het sy die belangrikheid van finansiële beplanning, lewensversekering, geldige testamente en opvolgbeplanning beklemtoon. Sy het lede aangemoedig om nie belangrike besluite uit te stel nie en betyds voorsiening vir hul families se toekoms te maak.
Lunel Crouse en Mieke van den Bosch (Spreker) van Van den Bosch Makelaars
Op kreatiewe gebied het Marthie Botha lede bekendgestel aan die woordkunskompetisie vir 2027, waar deelnemers ’n limeriek moet skryf. Met haar entoesiasme en praktiese wenke het sy gewys dat hierdie speelse digvorm binne elkeen se bereik is.
Daarna het sy ’n praktiese demonstrasie van die skraapkunstegniek aangebied. Lede het die geleentheid geniet om met akrielverf, skrapers en hul eie verbeelding unieke abstrakte kunswerke te skep. Die lokaal was gevul met lag, kreatiwiteit en die opgewondenheid van nuwe ontdekkings.
Heidi Lombard, Carina Esterhuizen en Alet Gouws – Kleur, kreatiwiteit en kuier.
Karen van Rensburg wat alles nóg meer kleurvol maak met haar kreatiwiteit.
Mieke van den Bosch (Van den Bosch Makelaars), Annalie Lategan (Voorsitter) en Karin Pienaar kleur die dag op hul eie manier in.
Tussen verf en kleurstories laat lede hule kreatiwiteit op papier dans.
Marthie Botha se skraapkuns-meesterstuk — waar kleur en tekstuur saam fluister, en die woud se stil stories tussen elke laag asemhaal.
Lede se uniek skraapkuns — ’n vrolike klomp kleure wat dans, bots, giggel en hul eie stories uitspat.
Die tak spreek hul opregte waardering uit teenoor Johané Botha vir haar gasvryheid en die beskikbaarstelling van die geriewe by Checkmate Coffee Shop en Aberdeen Self Catering, wat die byeenkoms in ’n warm en vriendelike atmosfeer moontlik gemaak het.
Na afloop het lede heerlike eetgoed geniet — pragtige cupcakes van Van den Bosch Makelaars en smaaklike soutighede deur Johané Botha van Checkmate Coffee Shop. ’n Smaakfees om elke kreatiewe oomblik af te rond.
Met ’n kombinasie van geloofsversterking, praktiese kennis en kreatiewe ontwikkeling het die Junie-vergadering weer eens bewys waarom die VLV ’n ruimte is waar vroue saam leer, groei en mekaar inspireer.
Agter Vlnr – Lize de Jager, Carina Esterhuizen, Mieke van den Bosch (Spreker) en Heidi Lombard.
Middel Vlnr – Karen van Rensburg, Esna Senekal (Gas), Ria Schoeman, Retha Lategan, Marthie Botha, Elna van Niekerk, Maritsa Schoeman, Karin Pienaar, Alet Gouws, Marlie Lategan, Johané Botha en Annalie Lategan (Voorsitter).
Voor: Lunel Crouse (Van den Bosch Makelaars)