Sirkel: Middelland
Tak: Aberdeen
Portefeulje: Potpourri
Saamroeper: Elna van Niekerk (Landbou en Tuinbou)
Lise de Jager (Leefstyl)
Suzanne Lategan (Openbare Sake)
Beriggewer: Karin Pienaar
Datum: 22 Oktober 2025
Die Aberdeen VLV-tak het op 22 Oktober 2025 bymekaargekom vir ’n inspirerende vergadering vol leersame en praktiese aanbiedings.
Voorsitter Lea van der Vyver het almal hartlik verwelkom, waarna Annalie Lategan die vergadering geopen het met ’n bemoedigende boodskap uit Lukas 24 – dat God selfs wanneer dit stil voel, steeds saam met ons stap.
Van Tuin tot Tafel – Leef ons tema uit
Onder leiding van Lea van der Vyver en Elna van Niekerk fokus VLV Aberdeen op 2026 se tema:
“Ons krag lê in spanwerk”
met die projek “Van Tuin tot Tafel” as praktiese uitdrukking van hierdie ideaal.
Elke lid het ’n klein boksie met kruiesaad, klippies en dryfhout ontvang — die begin van ’n eie miniatuur-kruietuintjie. Die idee is om nie net te plant nie, maar ook om foto’s van groei en vordering op die WhatsApp-groep te deel, sodat almal mekaar se pogings kan geniet en aanmoedig. So groei nie net die plantjies nie, maar ook die gevoel van samehorigheid in die groep.
Lea het verder herinner dat alles wat uit ons tuine kom — groente, blomme of selfs klippies — ’n seën kan wees, en dat ons deur hierdie eenvoudige gawes ook ander mense kan seën.
Landbou & Tuinbou: Maak jou eie jogurt
Elna van Niekerk het met groot entoesiasme ’n praktiese demonstrasie aangebied oor hoe om jogurt van bok- en beesmelk te maak.
Sy het verduidelik hoe eenvoudige natuurlike prosesse groot verskil kan maak: gewone melk word tot louwarm temperatuur verhit, waarna twee eetlepels natuurlike jogurt met lewende kultuur bygevoeg word. Die mengsel word oornag warm gehou — en die volgende oggend is daar romerige, vars jogurt gereed om te geniet.
Lede kon verskillende weergawes proe en het interessante variasies gesien — van gegeurde maaskaas tot verskille tussen bokmelk en beesmelk. Die aanbieding was nie net inligtingryk nie, maar ook heerlik prakties — en natuurlik smaaklik!
Elna van Niekerk verduidelik hoe om jogurt te maak.
Lise de Jager en Annelie Lategaan proe aan die bokmelk.
Leefstyl: Vyf maklike gewoontes vir ’n gesonder leefstyl
Lize de Jager het die lede aangemoedig om gesondheid as ’n lewensreis te sien, eerder as ’n bestemming. Sy het vyf eenvoudige, maar kragtige gewoontes gedeel wat almal kan toepas, ongeag ouderdom of omstandighede:
Beplanning en oefening: Maak tyd vir beweging wat vreugde bring — stap, dans of joga. Selfs 30 minute per dag maak ’n verskil.
Eetgewoontes en porsiebeheer: Gebruik jou hande as maatstaf – ’n vuis vir stysel, palm vir vleis, oop hand vir vis en twee hande vol vir groente.
Dermgesondheid: Ongeveer 80% van jou immuniteit lê in jou dermkanaal – eet genoeg vesel en gebruik probiotika.
Proteïeninname: Belangrik vir spiere en versadiging – kies hoender, vis, eiers, peulgewasse of neute.
Goeie slaap: Streef na sewe tot nege uur slaap per nag. ’n Gereelde roetine help jou liggaam herstel en rus.
Lize het afgesluit met die herinnering dat gesondheid oor vooruitgang, nie perfeksie gaan nie:
“Doen wat jy kan, geniet die proses, en wees sag met jouself.”
Lise de Jager deel praktiese wenke vir ‘n gesonder leefstyl.
Kreatiwiteit en Kompetisie 2026
Elna van Niekerk het kom spog met haar items wat sy gaan inskryf vir die VLV-kompetisies vir 2026.
Sy het haar inspirasie en tegnieke met die lede gedeel, en almal het haar met groot entoesiasme sterkte toegewens.
Openbare Sake : The Munga – The Toughest Race on Earth
Die gaspreker, Wilhelm van der Vyver, het vertel van sy deelname aan The Munga, bekend as “The Toughest Race on Earth.”
Die wedren strek van Bloemfontein tot Wellington – meer as 1 000 km in vyf dae. Wilhelm gebruik hierdie uitdagende rit as ’n bewusmakings- en fondsinsamelingsprojek vir Aalwynhof Ouetehuis in Aberdeen.
Hy het verduidelik dat dit nie bloot ’n sportprestasie is nie, maar ’n hulpprojek met ’n hart – ’n manier om die gemeenskap se aandag te vestig op Aalwynhof se finansiële uitdagings en die noodsaaklike werk wat daar gedoen word.
Met liggaamlike uithouvermoë, geestelike krag en geloof as sy dryfkrag, het Wilhelm die lede geïnspireer met sy woorde en sy dade.
Hy deel sy motivering in die woorde van Moeder Teresa:
“Ons kan nie almal groot dinge doen nie, maar ons kan klein dinge doen met groot liefde.”
Om Wilhelm se inisiatief te ondersteun besoek gerus sy webblad: https://cyclingforaalwynhof.co.za/.
Wilhelm van der Vyver – The Munga-uitdaging.
Wilhelm van der Vyver besig om voor te berei vir die Munga.
Wilhelm van der Vyver gereed om die langpad aan te durf.
Wilhelm van der Vyver se eie woorde oor die Munga-uitdaging.
Openbare Sake: Kunsmatige Intelligensie – vriend of vyand?
Wilhelm het ook met die lede gesels oor die gebruik van kunsmatige intelligensie (KI) in die moderne lewe.
Hy het vir elke lid ’n afskrif van ’n teks wat ChatGPT vir hom voorberei het, uitgedeel, en verduidelik dat hy slegs minimale inligting aan die program gegee het — tog het dit akkuraat geweet wie die VLV is en dat hy met dames sou gesels.
Hy het beklemtoon dat KI, soos ander tegnologiese hulpmiddels in die verlede, nie verdwyn nie maar deel van die toekoms is. Soos sakrekenaars destyds eers gevrees en later aanvaar is, behoort mense ook KI verantwoordelik te gebruik.
Sy boodskap was duidelik: KI het geen eie emosies of doelwitte nie; dit doen net wat die mens opdrag gee. Die mens bly in beheer, en daarom kan KI ’n waardevolle hulpmiddel wees vir leer, produktiwiteit en kreatiwiteit – mits dit wys gebruik word.
Wilhelm van der Vyver en Suzanne Lategan (Saamroeper Openbare Sake)
Die Oktober-vergadering het weereens getoon waarom VLV Aberdeen ’n lewendige en betrokke tak is — waar geloof, leer, gemeenskap en vrouekrag hand aan hand stap.
Want by die VLV glo ons: “Ons krag lê in spanwerk.”
Agter vlnr: Karen van Rensburg, Annelie Lategan, Lize de Jager, Carina van Rensburg, Engela James, Luise de Jager, Elize Steynberg en Karin Pienaar
Middel vlnr: Lea van der Vyver (Voorsitter), Elna van Niekerk en Suzanne Lategan
Voor: Johané Botha (Gas)
Tafeldekor en verversings verskaf deur Annelie Lategan en Susanne Lategan.