AURORA-TAK WORD 45!

OP 7 Mei was ons tak 45 jaar oud (gestig in 1979) en het ons dit gevier met ’n uitstappie na die Koringmuseum in Moorreesburg en middagete by die Plaasmol in Hopefield.

Die Koringmuseum, geopen in 1978, is enig in sy soort in Suid-Afrika en een van slegs twee sulke museums ter wêreld.

Hier het ons geleer oor die geskiedenis van koring, deur twee groot sale gestap vol implemente wat sedert 1800’s gebruik is vir ploeg, hark, saai en oes. Twee van ons vrouens se gades het saamgegaan, en ons kon hulle beswaarlik wegkry van die trekkers, sense, sekels, dorsmasjiene, ploeë en perdemeul. Die Perdemeul is ’n nuwe toevoeging wat op 13 Maart vanjaar amptelike ingewy is.

Die ou vervoermiddels soos die kakebeen-ossewa en kapkarre was fassinerend om in lewende lywe te sien.

Na ’n lang kuier, is ons na die Plaasmol in Hopefield. Dit was beslis meer as net ’n middag-ete. Hier kan jy drentel in die opelug tussen plaasdiere en jou verlustig in die kuns van herwinning; idees wat jou mond laat oophang. Jy stap ook nie hier weg sonder ’n plantjie of iets lekkers om later te eet nie.