Sirkel: SWD
Tak: Hartenbos
Portefeulje: Kuns en Handvlyt
Saamroeper: Annemie Erasmus
Beriggewer: Wilma van Staden
Datum: 6 Maart 2024
Konferensie bied ‘n geleentheid vir rymelary
Vyf lede van VLV Hartenbos het op 6 Maart 2024 die SWD konferensie bygewoon. Die versierings, eetgoed en heerlike geselskap was vir elkeen ‘n wonderlike atmosfeer wat bygedra het tot die positiewe ervaring van die geleentheid.
Pragtig gedekte tafels
Pragtig gedekte tafels
Lede van die tak het presteer met ‘n eerste plek en goud aan Rolien Smit vir haar kwilt bedoorgooi. Dorea du Plessis het ook ‘n eerste plek met haar hout huisies verwerf. Ida van Tonder het met ‘n tweede plek weggestap vir haar botterbroodjies.
Loper van Rolien
Huisies van Dorea
Botterbroodjies van Ida
Onder die groep bywoners van die VLV Hartenbos tak was Marietjie Albrecht. Sy kon nie inskryf vir enige afdeling nie, maar het tydens die konferensie haar unieke woordkuns beoefen, naamlik rymelary.
Marietjie beoefen hierdie kuns al solank as wat sy onthou. Oral waar sy in vergaderings en demonstrasies sit en luister en op toer is, beoefen sy haar kuns. Deesdae doen sy dit sommer op haar foon. Toe sy nog in die onderwys was, het sy baie inligting tot ‘n paar eenvoudige paragrawe opgesom en dit later begin rym. Dis ‘n baie interessanter manier van verslag doen, haar manier van “doodle”.
Hier volg Marietjie se rymelary van die konferensie.
SIRKEL SWD SE 90STE KONFERENSIE
VOËLVLEI
Veronica van Rooijen
Wonder hoe ver het ons met 2023 se voornemens gevaar
Maar dis verby… en ons kan nou weer van voor begin
So, met Sy genade, wees net ‘n gelukkiger, vrygewiger, feesvierende weergawe van laasjaar.
Maruanda Wynne is kunstenaar, skrywer en atleet
Wat ‘n verskil wil maak aan vroue in leed.
Van Kintsugi—‘n proses wat herstel met goud
tot haar Hartlap gedig vir seer vroue se behoud.
Vader, tel die flenters rondom my op
En maak vir my ‘n heel hart…. Dat my pyn kan stop.
Heer, flenters van toe en nou
Wat my my hele lewe lank sal hou!
Haar gebed van Hoop verander vroue in Sirië en Indië
Tot 1375 vroue met “issues” soos Annemarie.
“Don’t judge people….who’s who?
If you haven’t walked in their inner shoes”
Wees nederig en vertrou elke dag, een dag op ‘n slag.
Dan lei God jou van vlag tot vlag.
Na ‘n aanval deur ‘n kompleks-hond
Loop sy vandag nog met ‘n onwegsteekbare wond
Om haar te herinner dat jou lewe tot stilstand kan kom…terstond…
Alleen, in die vroeë oggendure,
hou sy haar broosheid op ‘n afstand… tussen haar vier mure.
Maar dis “OK” om gebroke te wees
Want daar is niks wat meer troos as God se Gees.
Leefstyl se Elmarie Engelbrecht
Het toe aan ons demonstratief gesegd:
Bak patat, rooi uie en bete
Voeg by kekererte, pietersielie, koljander, granaatpitte en neute
Maak ‘n heerlike komynsousie
En siedaar….geniet om ‘n braaivleisvuurtjie. te “cozy”!
So maak mens met lensies, wortels, amandels en blare
Esmé en Jan van ouds sou gese het: Nie in ons jare!
Valeria Terblanche van Opvoedkunde en Kultuur
Neem ons op ‘n digitale reis na die WBPV kongres
In Maleisië…met Magdie de Kock aan die stuur
Dit is die grootste plattelandse organisasie van Oos na Wes en die res.
Ons is almal verskillend van mekaar
So geniet mekaar, respekteer en aanvaar
Dit maak ons sterk
Probeer gerus, dit werk!
Lydie van Openbare Sake sê haar liefde vir Bali
sal haar nooit ooit nie vaal’ie.
Almal is oor Landbou ingelig daar
Subak is die styl deur Unesco aanvaar
Kiaatbome word bewaar
Klimaat is of nat of droog…klinkklaar!
Hul stapelvoedsel is rys
Vir mens, dier en die wat daar rondreis.
Kokosneute is groen, geel en harige bruin
Gebruik dit droog, vir suiker, melk en olie…glo goed vir die brein.
Baie vars produkte: vreemd en bekend
Durian, Dragon, Snake en Jack fruit…ongekend.
(Klink vir my na ‘n dieretuin!)
Volop tofu en koffie en soja
‘n Bobaas bestemming vir ‘n smulpaap… sonder weerga.
Baie, baie dankie aan die formidabele Voëlvlei
Jul het vandag waarlik die spreekwoordelike koring van die kaf geskei.
Sterkte dan aan Sedgefield vir volgende jaar.
Hoop jul kry iets by Dr Vogel om die senuwees te bedaar!
Marietjie Albrecht
Hartenbos
By ons mede-taklede het Marietjie sommer die platinum medalje gekry. Miskien ‘n kompetiese vir ‘n volgende keer…?
