Sirkel: SWD
Tak: Klein-Brakrivier
Studierigting: Leefstyl
Beriggewer: Lydie Terblanche
Datum: 27 Mei 2023
Klein-Brakrivier-taklede deel van Hekel safari-maraton
Klein-Brakrivier taklede, Joey Gouws, Susánne le Roux, Lynette Nel en Denise Taljaard was deel van die Nasionale Hekel Maraton. Al 21 stoele in die lokaal was deur deelnemers beset. Die Hekel Safari Maraton by Seefront Hartenbos het 12.00 op 26 Mei begin en 18.00 op 27 Mei geëindig. Teen 01.30 die oggend van die 27ste het deelnemers die vorige rekord vir blokkies (27 800) geëwenaar. Teen afsnytyd, na 30 ure se werk, is ‘n nuwe rekord van 70805 blokkies gehekel. Getalle het steeds ingestroom.
Daar is niks so lekker nie, soos om aan n uitdaging deel te neem wat landswyd aangebied word. Die projek is aanvanklik deur ATKV Arendsnes-tak georganiseer en was deel van die Maak n Verskil Projek. Die hele land het skielik aan die hekel geraak en die VLV -Kleinbrak lede het ook weggespring. Ons hekelaars het hulle goed van hulle taak gekwyt en hope 20cm x20cm blokkies tydens die 30 uur Maraton gehekel. Die blokkies word gebruik om komberse te maak vir behoeftiges in ons omgewing. Die volgende hekelmaraton word reeds beplan vir Vrydag 19 April en Saterdag 20 April 2024.