Bonnievale nuus

Sirkel: Worcester
Tak: Bonnievale
Portefeulje: Opvoeding & Kultuur
Datum: 12/09/2013
Beriggewer: Gesina de Wet

Bonnievale is baie bevoorreg om twee biblioteke te hê wat baie goed funksioneer en goeie diens lewer. Mev. Corine Syferts is die hoof van die biblioteke en het die dames ingelig oor die dienste wat die biblioteke bied. Sy verduidelik die nuwe “ IDkaart” uitleenstelsel wat in gebruik geneem is. Sy gee ook inligting oor alle dienste wat aangebied word, onder andere die rekenaarfasaliteite, ens.

Corine Syferts aan die woord.

Hetta Meiring bespreek die neiging van mense om in ‘n geselskap op hul selfone of tablette te werk. Dit word “phubbing” genoem. Daar is egter nou ‘n ernstige veldtog teen die ongemanierdheid. Die veldtog is deur ‘n groep jongmense in die sosiale media teen “phubbing” begin. Tieners kry so maklik die skuld vir die gedrag, maar al hoe meer volwassenes maak hul skuldig aan die swak gewoonte.

Sensei Chynthia Coetzee van Ashton gesels oor selfverdediging. Sy wys daarop dat ons altyd waaksaam moet wees, want dit is ongelukkig so dat ons niemand meer kan vertrou. Ons moet op ons hoede wees, selfs al vra iemand net hoe laat dit is. Moet nooit ‘n tuin- of huiswerker wat op ‘n ongeleë tyd met versoeke opdaag, vertrou nie. Ouer persone is sagte teikens en 92% van aanrandings is op persone bo 75 jaar. Moet ook nie jongmense of kinders blindelings vertrou nie, want 76% van aanrandings is deur persone jonger as 30 jaar.

Sy gee wenke oor hoe om motorsleutels,handsakke, sambrele, ens. te gebruik om jouself te verdedig. Sy beklemtoon dat jy nooit moet huiwerig wees as jy terug “aanval”. Daarna gee sy en die vier karate swart belt studente, wat saam met haar gekom het, eenvoudige praktiese voorbeelde van hoe om jouself te verdedig. As daar musiek was, sou die uitvoering van die tegnieke meer na danspassies gelyk het. Nietemin het die lede hul goed teëgesit toe hulle aangeval is.

Helen de Wet lees daarna ‘n artikel uit die Rooi Rose van September 2013 oor Kuberbroosheid. Die media en sosiale netwerke het dikwels ‘n groot invloed op tieners se selfwaarde. Die prentjie in ons kop van onsself is die selfbeeld. Die selfbeeld word van kleins af gevorm deur die wêreld om ons. Selfwaarde is die waarde oordeel wat ons oor ons selfbeeld fel. Selfwaarde sluit ook in selfvertroue en selfaanvaarding. Dit is werklik die moeite werd om meer oor die onderwerp uit te vind deur die artikel met u lede te bespreek. Dit kan dalkies help dat Ma en Ouma die tiener beter verstaan.